ବୈଦିକ ଜ୍ୟୋତିଷ ଶାସ୍ତ୍ରରେ ୯ଟି ଗ୍ରହଙ୍କର ବିଶେଷ ମହତ୍ଵ ରହିଛି । ଏହି ଗ୍ରହମାନଙ୍କ ମଧ୍ୟରୁ ଶନି ଗ୍ରହଙ୍କର ଅଧିକ ମହତ୍ଵ ରହିଛି । ଜ୍ୟୋତିଷ ଶାସ୍ତ୍ରରେ ଶନି ଗ୍ରହଙ୍କୁ କୃର ଗ୍ରହ ଭାବରେ ବିବେଚନା କରାଯାଇଛି । କିନ୍ତୁ ଶନି ଗ୍ରହ ବ୍ୟକ୍ତିର କାର୍ଯ୍ୟ ଉପରେ ନିର୍ଭର କରି ଶୁଭ ବା ଅଶୁଭ ଫଳାଫଳ ଦେଇଥାନ୍ତି । ଯଦି ଜାତକ କୁଣ୍ଡଳୀରେ ଶନି ଗ୍ରହ ଶକ୍ତିଶାଳୀ ହୋଇଥିବେ ତେବେ ଶୁଭଫଳ ମିଳିଥାଏ ଓ ଜୀବନରେ ଭଲ ପରିଣାମ ମିଳିଥାଏ । ଯଦି ଶନି ଗ୍ରହ ଦୁର୍ବଳ ହୋଇଥିବେ ତେବେ ଅଶୁଭ ଫଳ ଦିଅନ୍ତି ।
ଏହା ବ୍ୟତୀତ ଶନି ଗ୍ରହ ଅନ୍ୟ ଗ୍ରହମାନଙ୍କ ଠାରୁ ମନ୍ଥର ଗତିଶୀଳ ହୋଇଥାନ୍ତି, ଯେଉଁ କାରଣରୁ ଶୁଭ ଅଶୁଭ ପରିଣାମ ବହୁତ ଦିନ ପର୍ଯ୍ୟନ୍ତ ଭୋଗ କରିବାକୁ ପଡିଥାଏ । ଶନି ଗ୍ରହ ଯେ କୌଣସି ରାଶିରେ ଅଢେଇ ବର୍ଷ ପର୍ଯ୍ୟନ୍ତ ରୁହନ୍ତି ପୁଣି ରାଶି ପରିବର୍ତ୍ତନ କରନ୍ତି । ଏହିଭଳି ୧୨ଟି ଯାକ ରାଶି ପରିବର୍ତ୍ତନ କରିବାକୁ ତାଙ୍କୁ ୩୦ବର୍ଷ ଲାଗିଥାଏ । ଶନିଙ୍କ ସାଢେସାତି, ଢେୟା ଓ ମହାଦଶା ଚାଲିଲେ ଜାତକକୁ ଅନେକ ସମସ୍ୟାର ସମ୍ମୁଖୀନ ହେବାକୁ ପଡିଥାଏ । ଶନି ଗ୍ରହ ମକର ଓ କୁମ୍ଭ ରାଶିର ସ୍ଵାମୀ ଅଟନ୍ତି । ତୁଳା ରାଶି ଶନିଙ୍କ ଉଚ୍ଚ ଓ ମେଷ ରାଶି ଶନିଙ୍କ ନିଚ୍ଚ ବୋଲି କୁହାଯାଏ । ସେହିପରି ପୁଷ୍ୟା, ଅନୁରାଧା ଓ ଉତ୍ତରଭାଦ୍ରପଦ ନକ୍ଷତ୍ରର ମଧ୍ୟ ଶନି ଗ୍ରହ ସ୍ଵାମୀ ଅଟନ୍ତି ।
ଶନିଙ୍କ ସାଢେସାତି-
ଜାତକ କୁଣ୍ଡଳୀରେ ଚନ୍ଦ୍ର ଯେଉଁ ରାଶିରେ ଯେତିକି ଡିଗ୍ରୀରେ ବସିଥାନ୍ତି ସେଥିରେ ୪୫ଡିଗ୍ରୀରେ ଯେବେ ଶନି ଅତିକ୍ରମ କରନ୍ତି ସେତେବେଳେ ଶନିଙ୍କ ସାଢେସାତି ଆରମ୍ଭ ହୋଇଥାଏ । ୪୫ଦିଗରୀରେ ଅତିକ୍ରମ କରି ଚନ୍ଦ୍ରଙ୍କ ଠାରୁ ଆଗେଇଯାଇ ୪୫ଡିଗ୍ରୀରୁ ଦୂରକୁ ଯାଆନ୍ତି, ସେହି ପର୍ଯ୍ୟନ୍ତ ଶନିଙ୍କ ସାଢେସାତି ଚାଲେ । ସମୁଦାୟ ଏହି ସମୟ ସାଢେସାତ ବର୍ଷ ହୋଇଥାଏ । ଏହି କାରଣରୁ ସାଢେସାତି କୁହାଯାଏ । ଗୋଟିଏ ରାଶି ୩୦ ଡିଗ୍ରୀ ହୋଇଥାଏ । ଶନି ଗୋଟିଏ ରାଶିରେ ଅଢେଇ ବର୍ଷ ରୁହନ୍ତି । ଏହା ସହିତ ଚନ୍ଦ୍ରଙ୍କର ଦେଢ ଦେଢ ଦୁଇଟି ରାଶି ଅର୍ଥାତ୍ ୪୫ ଡିଗ୍ରୀ ପର୍ଯ୍ୟନ୍ତ ଭ୍ରମଣ କରି ସ୍ଥିତି ସୃଷ୍ଟି କରନ୍ତି । ଅର୍ଥାତ୍ ଅଢେଇ ଅଢେଇ ବର୍ଷ କରି ତିନିଟି ଭାଗ ତିନି ଭାଗ କଲେ ସାଢେସାତ ବର୍ଷ ହୋଇଥାଏ ।
ଧନୁ, ମକର ଓ କୁମ୍ଭ ରାଶିରେ ସାଢେସାତି-
ଶନି ଗ୍ରହ ବର୍ତ୍ତମାନ ମକର ରାଶିରେ ଗମନାଗମନ କରୁଛନ୍ତି । ଏହି ସମୟରେ ଧନୁ, ମକର ଓ କୁମ୍ଭ ରାଶିରେ ଶନିଙ୍କ ସାଢେସାତିର ପ୍ରଭାବ ପଡିଛି । ଏହି ସମୟରେ ମିଥୁନ ଓ ତୁଳା ରାଶିରେ ଶନିଙ୍କ ଢେୟା ମଧ୍ୟ ଚାଲିଛି । ୨୦୨୨ମସିହାରେ ଶନି ମକର ରାଶିରୁ ବାହାରି ନିଜସ୍ଵ ରାଶି କୁମ୍ଭ ରାଶିରେ ପ୍ରବେଶ କରିବେ । ଶନି କୁମ୍ଭ ରାଶିରେ ପ୍ରବେଶ କରିବା ମାତ୍ରେ ଧନୁ ରାଶିରୁ ଶନିଙ୍କ ସାଢେସାତି ଶେଷ ହୋଇଯିବ । କିନ୍ତୁ ଧ୍ୟାନ ଦେବାକୁ ହେବ ଯେ ୨୦୨୨ମସିହାରେ ଶନି ବକ୍ରୀ ହୋଇ ପୁଣି ମକର ରାଶିରେ ଗୋଚର କରିବେ । ମକର ରାଶିରେ ଶନିଙ୍କ ବକ୍ରୀ ଓ ମାର୍ଗୀ ହେତୁ କିଛି ସମୟ ପାଇଁ ଧନୁ ରାଶିରେ ସାଢେସାତିର ପ୍ରଭାବ ପଡିବ ।
୨୦୨୩ ମସିହାରେ ଧନୁ ରାଶିରେ ଶନିଙ୍କ ସାଢେସାତିର ପ୍ରଭାବ ଶେଷ ହୋଇଯିବ । ୨୦୨୫ ମସିହାରେ ମକର ରାଶିରେ ଶନିଙ୍କ ସାଢେସାତିର ପ୍ରଭାବ ଶେଷ ହୋଇଯିବ । ୨୦୨୮ ମସିହା ଜାନୁଆରୀ ମାସ ୨୩ତାରିଖରେ କୁମ୍ଭ ରାଶିରେ ଶନିଙ୍କ ସାଢେସାତିର ପ୍ରଭାବ ସଂପୂର୍ଣ୍ଣ ରୂପେ ଶେଷ ହୋଇଯିବ । ବର୍ତ୍ତମାନ କୁମ୍ଭ ରାଶିରେ ଶନିଙ୍କ ସାଢେସାତିର ପ୍ରଥମ ଚରଣ ଚାଲୁଅଛି ।